Eye Level English & Math

妹妹係細女，即係九月出世，今年暑假未滿三歲，好多暑假班佢都參加唔到，只係喺樓下畫室左一個月畫班，但係佢喊得好犀利，點都唔肯入去，或者間斷咁喺入面喊，所以咩都無再參加。

佢嘅狀態都幾飄忽，之前N班喊左一日就無再喊，今年轉左學校，K1返學只係第一日喊左幾個字，之後嗰兩日有我帶佢返佢都無再喊，如果平時見到我，佢一定喊到傻晒。

九月開始報左學校嘅游泳班，頭四堂邊喊邊游，我老公又擔心又嬲，話我唔識教佢？！um?? 我諗佢忘記左佢自己細個都係咁。幸好妹妹之後似乎鍾意左游泳，於是我安排佢去 eye level 做 assessment，諗住報 eye level English & Maths，原本都諗住佢一定喊，因為佢企喺門口唔肯入去，好彩入面有幾個姐姐同佢玩，佢出嚟仲同我講佢好開心。

比佢返額外English & Maths 班係因為轉校之後，課程淺左好多，K1現在才教1-10，加上其他同學喺暑假已經上公文，唔怪得佢地識咁多野。阿女仲係好似BB咁，雖然我做阿媽好鍾意佢仲係咁BB，但係佢無可能唔長大嘛。

assessment 佢做得唔錯，原來佢識寫1-10同埋A-Z，我真係而家先知道，因為平時啲功課無教佢寫，只係畫下直同橫線。希望妹妹喜歡學習，可以自動自覺做好功課同溫習！

全職媽媽定雙職媽媽

又來到十字路口，究竟應否選擇從雙職媽媽轉做全職媽媽?!

每一次都係工人引起嘅問題，最近尤其頻密，請佢返來想佢喺我返工嘅時間，可以幫我照顧 Bernice，但係佢照顧得唔好之餘，仲令到我成日同老公嘈交。老公係超級緊張型，事無大小有關Bernice都極度緊張。

最近，寒冷天氣警告下，工人無替Bernice著褸返學，行過去坐校巴條路好大風，真係唔明白，明知天氣冷，佢自己知道要著褸，點解唔幫Bernice著呢？最後要勞煩屋企老人家送去學校。

瞓覺時因為Bernice著睡袋所以無著羊毛底，吩咐工人如果Bernice起身就要著返，佢就問返學係咪要換另一件羊毛底........又唔知點解幫我女著兩件底衫, 嗰日著校裙就問我係咪要著條睡褲打底........總之係每一日都要吩咐佢應該點幫著衫返學。明知佢理解能力唔高，我就比本簿仔佢寫低，但係寫完佢又係無照做，原因係唔記得睇。

每日瞓覺無論日間定係夜晚都一定著瞓袋，尋日唔知道佢點解唔幫Bernice著，老公喺cam見到，就叫我問佢，佢話有，隔左十分鐘，老公問係無？點解？我又打返屋企問，佢改口話無!  我都唔知點可以同佢溝通，佢又唔係唔識英文。然後又比個藉口我話我電話好嘈好細聲，之後我又比我老公鬧 >_<

再加上，佢向財仔借錢，又做佢表姐擔保，佢表姐之前係喺另一屋企人屋企做，但已炒左佢，借落筆錢只係還左一期，另外仲有電話費！追債信無停止過!

話雖如此，但係我仲未決定應該點做，始終兩個人收入總好過一個人。我唔係好想令到另一半咁大壓力。另一方面，如果真係做全職媽媽，我應該可以勝任，因為我從小已經做好多家務，湊女亦可以，Bernice 同我好親近，我有信心可以湊好佢。