今日終於遞左封辭職信，下個月尾開始當 FTM，究竟是對是錯，真係唔敢講。
今次對住老闆無上次咁驚，佢都好似預左我又遞信咁，而且我諗佢應該明白我處境，個女無人湊，做阿媽唔通唔應該放棄工作湊咩？
唔知道工人今次又借左幾多錢?
佢自從舊年放完假返來之後都無心機做野，唔係佢唔錫阿女，而係佢不停做錯野，令到我地兩公婆都好唔放心，返工都不停睇 cam，打電話返去叫佢留心啲工作，唔好發夢。尋日早上我出門口前又同我講：I need rice for tonight mum. 都已經唔知第幾次吩咐佢早啲同我講無米，但係佢依然係無米或者得返半杯米先話比我知。其實我應該自己check下，但係放工返去屋企都已經想休息，仲入廚房野咩，佢日日煮飯都唔出聲！
尋日佢又話無米之後，我就問佢，究竟你屋企定你又發生咩事？點解做野咁唔上心？想離開可以同我講，如果想搵錢繼續喺我屋企做，就要用心做嘛。最後佢自己話想返去，咁好喇，反正都諗住下個月炒佢，而家唔使比多一個月佢。
其實除左工人問題，我老公都係問題，佢返工太多野做，太辛苦，返到屋企無餐好野食，因為工人煮嘅野好難食，而且佢好緊張個女，返工都掛住唔放心比工人湊，所以為左佢可安心工作，我湊就係唯一出路。
話說回頭，真係好驚自己湊唔掂個女同做唔掂啲家務，唯有頂硬上！
